Subway er staðurinn, þar sem herra Ferskleiki er maðurinn.
Já, ég er í svona tjáningaráfanga þar sem við eigum að gera ræður um ýmislegt. Verkefnið fyrir morgundaginn var að búa til ræðu með vandamáli, sem við myndum svo finna lausn á. Hér er ræðan mín:
Í hversdagslífinu geta komið upp ýmis konar vandamál, bæði stórvægileg og smávægileg. Ingi litli er 18 ára snáði sem vaknaði um morguninn þann 6. janúar síðastliðinn, hress og sprækur, og sveif líkt og á bleiku skýi í gegnum skóladaginn. Eftir skóla ákvað Ingi að gera sér dagamun og fara á Subway og fá sér uppáhaldskafbátinn sinn, en hann er með kjúklingabringu, en þess ber að geta að Ingi býr í Borgarnesi þar sem enginn Subwaystaður er. Eftir um klukkutíma akstur, 1000 krónur í göngin og einhverja bensíneyðslu, var Ingi svo mættur á Subwaystaðinn á Ártúnshöfða, brosandi útað eyrum því hjarta hans var fullt af hamingju enda bátur með kjúklingabringu það besta í heimi. En á örskotsstundu var þessu öllu svipt í burtu. Á skilti stóð eftirfarandi; “kjúklingabringurnar eru búnar í bili... við mælum með kalkúnabringu í staðinn og blablabla....”. Þetta var sérstaklega erfitt fyrir Inga að skilja, þar sem að framan á Morgunblaðinu var frétt um offramboð á kjúklingum, og Ingi spurði afgreiðslukonuna hvort ekki væru notaðir kjúklingar í kjúklingabringurnar. En nóg um Inga, rúmum 2 mánuðum seinna er þetta blessaða skilti ennþá uppi á öllum Subway-stöðum bæjarins. Eftir að hafa grennslast fyrir um málið, var mér sagt að bringurnar væru pantaðar erlendis frá, en ekki gat grey afgreiðslustúlkan sem ég spurði svarað því hver ástæðan fyrir seinkun á komu kjúklingabringanna væri.
Sem mikill kjúklingabringufíkill fór ég að velta fyrir mér lausnum á þessu vandamáli. Auðvitað væri hægt að sleppa þessu og fá sér bara kalkúnabringu, en það vita það allir sem reynt hafa að þær eru ekki jafn góðar, og ekki nándar nærri jafn seðjandi. Önnur lausn væri að kaupa bara grænmetiskafbát, og fara svo í nóatún og kaupa nokkrar tilbúnar kjúklingabringur úr heita borðinu. Það er sosum ágætt, en mér finnst það of mikið vesen, og svo skellihló afgreiðslumaðurinn í Nóatúni að mér þegar ég bað hann um að setja bringurnar beint á kafbátinn. Nei krakkar mínir, lausnin er einföld og við vitum það öll. Stjórn Subway á Íslandi þarf að biðja um undanþágu frá því að panta bringurnar að utan, og kaupa kjúklinginn frá íslenskum framleiðendum. Subwaystaðirnir eru orðnir nægilega margir til að þetta fyrirkomulag hefði ekki neikvæð áhrif á rekstur fyrirtæksisins. Þarna er líka komin hugsanleg lausn á öðru vandamáli, sem er offramboð á kjúklingi á Íslandi, og þá er spurning hvort að landbúnaðarráðuneyti getur ekki að hluta til greitt niður kjúklinginn fyrir Subway, þó ég ætli nú ekki að fara með hvort það sé á einhvern hátt framkvæmanlegt. Eitt er ljóst, að forráðamenn Subway verða að gera eitthvað annað í málinu, en að setja upp skilti sem segir að kjúklingabringurnar séu ekki til í bili, og þetta bil er líka orðið allt of langt. En þangað til munum við Ingi, og fjöldi annnara neytenda einfaldlega leita annað.
Athugið að í þessari ræðu er ég að setja mig í hlutverk. Ég hef ekki einu sinni smakkað kjúklingabringurnar á Subway. BMT-inn þar er hins vegar alveg að gera sig! Það sem fékk mig til að gera þessa ræðu var að Arthúr sagði frá þessu bringuleysi, frekar vonsvikinn, og mér fannst svo fyndið að einhver skyldi vera að pæla í þessu. Arthúr sagði líka frá þessu eins og hann væri að segja okkur að einhver hefði dáið.
p.s. Mér finnst ég ætti að fá frían BMT í ár fyrir slagorðið sem ég notaði í titlinum...